Фельетон

Кіраўнік слонімскай суполкі БНФ Павел Севасцян звярнуўся да дэпутата Палаты прадстаўнікоў Алы Сопікавай з просьбай расказаць, як яна выконвае перадвыбарчыя абяцанні («праз заканадаўчую дзейнасць фінансава аздараўляць сельскую гаспадарку»). У адказ дэпутатка спаслалася на… указы прэзідэнта. Раней у якасці сваёй заслугі Ала Сопікава лічыла продаж самагону «Першачок», які вырабляецца на Слонімшчыне.

Старшыня «Беллегпрама» Таццяна Лугіна заявіла, што яна мяркуе звярнуцца да ўрада, каб ён урэгуляваў продаж тавараў праз крамы «сэканд-хэнд».

На ферме ў Лiёзненскім раёне даглядчык жывёлы меў у сваім распараджэнні каня. Калі даглядчык звольніўся, верны конь збег з фермы на сядзібу былога гаспадара. Міліцыянеры, якія завіталі туды, высветлілі, што мужчына паспеў прадаць каня на мяса.

Пяты год запар Беларусь траціць пазіцыі ў сусветным рэйтынгу шчасця: з 81-га месца апусцілася на 156-е…

Выступаючы перад дэпутатамі, прэзідэнт сказаў, што годзе назаляць яму наконт беларускай мовы: маўляў, у гэтым пытанні ўсе кропкі над «і» расстаўлены. Таму яго абурылі стэнды з тэкстам «Выконвай хуткасны рэжым»: у кіроўцаў слова «рэжым» выклікае асацыяцыі з дыктатурай. Ужо праз два дні на трасе Мінск — Віцебск з’явіліся рускамоўныя стэнды «Соблюдай скоростной режим».

У студзені многія жыхары Маладзечна скардзіліся кіраўніцтву прадпрыемства «Камунальнік» на тое, што на вуліцы Францыска Скарыны не прыбраны снег. У красавіку яны атрымалі адказ, што снегу больш няма.

Работнікі медыцынскай установы ў Глускім раёне ў працоўны час і ў выхадныя дні будавалі дом свайму кіраўніку.

Калі ў Баранавічах рыхтаваліся сустрэць прэзідэнта, гораду надавалі прыстойны выгляд. Некаторыя недахопы схавалі пры дапамозе маскіровачнай сеткі (да прыкладу, менавіта так «схавалі» занядбаную ферму паблізу гіпермаркета «Карона»).

Дэпутат Ганна Канапацкая абурылася з-за таго, што Нацыянальны сход не пажадаў пярэчыць прэзідэнту наконт законаў аб інвестыцыях і прыватызацыі. Праекты былі аднадушна адобраны абедзьвума Палатамі, а калі прэзідэнт не падпісаў іх, дэпутаты пакорна пагадзіліся з пярэчаннямі кіраўніка дзяржавы.

Мясцовая ўлада ліквідавала аўтастанцыю ў аграгарадку Доўск. Зняверыўшыся ў тутэйшым начальстве, жыхары напісалі зварот да прэзідэнта ЗША Трампа: просяць устанавіць на закрытай аўтастанцыі біятуалет, сметніцы, лаўкі, печ-«буржуйку»…