С. Законнікаў «Беражы сябе, Украіна!»
Жыццё паказвае, што мой даўні верш, які перакладзены чатырма ўкраінскімі паэтамі, не страчвае сваёй актуальнасці. Пасылаю яго як знак салідарнасці ўсім, хто жадае дабра і шчасця любімай Украіне, мужна стаіць за яе волю і лепшую долю. Край святы паўстае на руінах,Каб задыхаць на поўныя грудзі...Беражы сябе,Украіна,Бо другой Украіны не будзе.
На шляху да свабоды павінна
Ты не ведаць ні страху,
ні зморы.
Беражы сябе,
Украіна,
Ад Палесся да Чорнага мора.
Беражы ад ліхіх чужаніцаў
Родны сцяг,
што з’яднаў у палосах
Залатыя палі пшаніцы
І блакіт неабдымных нябёсаў.
Беражы добрай долі пачатак…
Хай надзеяй праменяцца вочы
Гожых парубкаў і дзяўчатак,
Што табе ўзлёт і веліч прарочаць.
Слава продкаў нанова ўваскрэсне,
Бо ў цябе ад бяды ёсць замова —
Непаўторныя ў свеце песні
І Шаўчэнкі дзяржаўнае слова.
Каб нямой не рыдаць на руінах,
Каб не гнуцца рабыняй ніколі,
Беражы сябе,
Украіна,
Беражы сябе,
Украіна!..
Ад цябе мы навучымся волі!
25. 03. 1996
Сяргей ЗАКОННІКАЎ