А бюджэт з БРСМ узгадняюць недарэм!
Дэпутат Палаты прадстаўнікоў Ганна Канапацкая паведаміла, што, аказваецца, выкарыстанне бюджэтных сродкаў на развіццё сельскай гаспадаркі і рыбалоўства трэба ўзгадняць з… БРСМ! Міністра сельскай гаспадаркі Апанавала зранку злосць. Таксама злыя, як аўчаркі, Намеснікі. Падстава ёсць:
У іх настрой такі паганы,
Бо не зацверджаны бюджэт.
А значыць, марна строіць планы,
Тым больш выконваць іх як след.
Бюджэт прадуманы, празрысты,
Па ўсіх канонах неблагі:
Найлепшыя спецыялісты
Над ім высушвалі мазгі.
Яны прыйшлі да згоды ледзьве…
І канчатковы дакумент
Усё дазвання прадугледзеў:
Туды рубель, сюды працэнт.
Чыноўнікі, што зверху й знізу
На ўсіх прыступках галіны,
Паставілі, як кажуць, візу —
Бюджэт адобрылі яны.
І абласныя выканкамы,
І самы значны камітэт,
І камітэт нягеглы самы —
Усе ўхвалілі той бюджэт.
Чаму ж міністр шалеў ад злосці?
Глузды напружвалі дарэм,
Бо неўспадоб у лічбах штосьці
Кіраўніку БРСМ.
Не хоча ставіць злыдзень візы,
А значыць, не дае дабра.
О, як абрыдлі ўжо капрызы
Уяўнага таго «бугра»!
Напэўна, ведаюць і дзеткі:
Пустое месца той саюз.
А кіраўнік пыхлівы гэткі,
Нібыта ён — казырны туз.
А ўсё чаму?
Бо той суполцы
Сам прэзідэнт надаў вагу.
Хоць месца ёй на барахолцы,
Але, як бачна, гне ў дугу
Міністра сельскай гаспадаркі
І дадае яму праблем.
Звярнуўся ён да сакратаркі:
— Ты пазвані ў БРСМ,
Скажы, каб іхні заправіла
Як найхутчэй сюды прыпёр.
Яна, канешне, пазваніла
І запрасіла вельмі міла.
А як інакш? Такі «бугор»!
Не дасць, магчыма, хтосьці веры,
А для мяне дык не сакрэт:
Нагою расчыніў ён дзверы
У міністэрскі кабінет
І заявіў яшчэ з парога:
— Не падпішу бюджэт такі,
Бо ў ім заган і хібаў многа.
Яго кляпалі вахлакі!
— Вы ў сельскай гаспадарцы — дока?
Вы ў рыбнай гаспадарцы — хват? —
Міністр прыжмурыў хітра вока,
Насмешлівы ў яго пагляд.
Узвіўся лідар «камсамольскі»:
— Ва ўсім ёсць навыкі ў мяне!
Хоць я і з горада — не з вёскі,
Ды спец і ў гэтай галіне!
Выдатна, скажам, са свініны
Умею смажыць шашлыкі.
У межах усяе краіны
Наўрад ці майстар ёсць такі.
Люблю таксама сёрбаць юшку,
Тым болей — на рачной вадзе.
І асабліва пад чакушку
Уежна юшка мне ідзе…
— Пераканаў! Пры добрай чарцы
Мы ўсе харошыя спяцы
Не толькі ў сельскай гаспадарцы…
Цяпер давай звядзём канцы:
Якія ж ты папраўкі-змены
Унесці хочаш у бюджэт?
Бадай, твой вопыт несумненны
Пазбавіць нас ад многіх бед…
Прыўзняўся лідар «камсамольскі».
— Я ўсё зраблю за пяць мінут!
Патрэбна ў ім паставіць коскі:
У гэтым месцы… тут… і тут.
— Ну ты глядзі: і праўда быстра!
Я думаў, будзе «гемарой»…
І цэлы тыдзень у міністра
Быў вельмі радасным настрой.
Вось так знялі праблему гэту.
І ўсім нам ісціна відна,
Што без БРСМ бюджэту
Была б хана
Ці грош цана.
* * *
Пераканаліся цяпер вы:
БРСМ — аўтарытэт!
А ёсць жа ў нас яшчэ рэзервы,
Каб бездакорным быў бюджэт:
Хай уплываюць на міністра
З «бээрэсэмам» заадно
Сабакаводаў таварыства
І клуб аматараў кіно…
Алесь Няўвесь
Чытайце таксама ў рубрыцы «Фельетон»:
Міліцыянераў — цьма. Можа, кормім іх дарма?
«Уласнай» вуліцай герой незадаволены парой….
На парадзе для нас самы раз унітаз