Categories: Фельетон

На свята выйдуць ветэраны, дзе развярэдзіць вірус раны

Ветэранскія арганізацыі Расіі накіравалі Уладзіміру Пуціну зварот з просьбай перанесці парад у гонар 75-годдзя Перамогі на больш познюю дату ў сувязі з каранавіруснай інфекцыяй. А Беларуская арганізацыя ветэранаў заявіла, што ў нашай краіне такой неабходнасці няма. Для ўласных мэт, задум і планаў, Каб затлуміць усім глузды, Улада наша ветэранаў Як ледаколаў ці таранаў Выкарыстоўвае заўжды.

Згадайма пра праспект Скарыны.
Не падабалася імя
Чамусь кіраўніку краіны.
Хто, ветэранаў акрамя,
Кіраўніку падставіў плечы
І напісаў тады зварот?
А выглядала так, дарэчы,
Што пажадаў увесь народ,
Бо ветэраны — то аснова
Усіх здабыткаў-перамог,
І іх праўдзівейшае слова
Аспрэчыць можа толькі Бог.
Хоць быў падман, канешне, чысты,
Які і выкрыўся, калі
Тых ветэранаў актывісты
Як ні шукалі — не знайшлі.
Сказаць і зараз слова важка
Пара настала акурат:
Ад прэзідэнта ёсць адмашка —
Правесці велічны парад.
Не дзіва гэткія парады —
Штогод праводзяцца яны,
Хоць і не ўсе парадам рады,
Бо грошы трацяцца з казны,
А ў нас і так бюджэт дзіравы,
Таму не лішнія рублі,
Каб сродкі траціць на забавы,
Каб мы пацешыцца змаглі;
На новы дом ці школу досыць
Было б, напэўна, грошай тых.
А тут яшчэ зараза косіць
Старых і нават маладых.
У гэткі час праводзіць «гулі» —
Як бегчы на варожы дот
І падстаўляць сябе пад кулі,
Калі стракоча кулямёт.
І ветэраны, што ў Расіі,
Пазбегнуць хочуць гэтых «куль»:
У прэзідэнта папрасілі:
— Не трэба нам парад пакуль;
Мы проста возьмем чарку дома
За тых, хто з бою не прыйшоў…
А нашы ўсклікнулі, вядома:
— Мы хочам бачыць тое шоу!
Хай пройдуць шчыльнымі радамі
Краіны нашай ваяры!
А калі трэба, выйдзем самі,
Хоць і сканаем без пары.
І нам падараць многа кветак,
І кожны будзе дужа рад!
Ці так было, ці ўсё ж не гэтак,
Але адбудзецца парад!
* * *
Хоць недалёка ўжо хаўтуры,
Ды, паслухмяныя, яны
Зноў закрываюць амбразуры,
Як і падчас былой вайны…