Дактары, педагогі абіваюць парогі
Прафсаюз медыкаў дамагаецца ад улады, каб па правах на арэнднае жыллё дактароў прыраўнялі да міліцыянераў. Нашы міліцыянеры —Падпалкоўнік ці старлей —Маюць льготы на кватэры,Многа іншых прывілей.
І пытанне, што рэзонна,
Задалі сабе ўрачы:
«А чаму ж улада сёння
Нам не хоча памагчы?
Мы і зараз, як калісьці,
Лечым наш народ ад ран
І прыносім шмат карысці
Для здароўя грамадзян».
За ўрачамі й педагогі,
Мовіць так, раскрылі рот:
«Мы працуем да знямогі,
Каб разумным быў народ,
Каб квітнела ў нас дзяржава
І напотым, і цяпер.
Дык чаму не маем права
На арэнду тых кватэр?
Хай жа возьмецца за гэта, —
Так рашылі, — прафсаюз,
Не вылазіць з кабінета,
Дзе сядзіць галоўны «туз»,
Што «малюе» на паперы
Подпіс свой наконт ільгот,
Хай штурмуе тыя дзверы,
Калі трэба, цэлы год».
Прафсаюзаў верхаводы
Паказалі свой імпэт
І наведалі для ўгоды
Велькаможны кабінет.
«Тузу», што ў дыхтоўным крэсле
Праціраў здаўна штаны,
Ад сваіх людзей прынеслі
Просьбу слёзную яны:
— Шчыра моляць педагогі,
І гатовы дактары
Пакланіцца вам у ногі
(І не раз, а нават тры),
Каб арэндныя кватэры
Ім давалі напавер.
Вунь жа міліцыянеры
Не вылазяць з тых кватэр…
Мы ж адну задачу мелі
Заўсягды — то не сакрэт:
Каб было здароўе ў целе,
А ў мазгах — духоўны свет.
Для таго мы, праўда, розны
Ужываем інструмент:
Як заўжды, дубінкай грознай
Лечыць люд, прабачце, мент;
Каб аблегчыць людзям мукі,
Нават з даўняе пары
Тэрмінова бралі ў рукі
Востры скальпель дактары;
Для настаўнікаў — указка
Найгалоўнейшы прадмет.
Дык зрабіць ім варта ласку —
Даць кватэры тыя след.
Быў такі адказ ад «туза»:
— Ці ж здаём за домам дом?
Ці ж у нас кватэр ад пуза?
Толькі тым мы іх даём,
Хто патрэбны несумненна,
Ад каго карысці шмат,
Без каго народу дрэнна,
Існаваць не можа лад.
Да міліцыі крытэрый
Падыходзіць акурат.
І таму даём кватэры —
Вельмі важкі ейны ўклад!
Хоць прызнацца я павінны
І сказаць вам проста ў лоб:
Існаваць без медыцыны
Вельмі цяжка нам было б.
Адукацыя таксама
Дужа многа нам дае,
І патрэбна, скажам прама,
Заахвоціць бы яе…
— Дык за чым тады замінка?
— Скальпель — сродак неблагі,
Ды не гэтак, як дубінка,
Выпраўляе ён мазгі…
Чытайце таксама ў рубрыцы «Фельетон»:
Далі альтэрнатыву: пабіць у хвост ці ў грыву?
Ці ж адзін цяпер гэткі афіцэр?
Новыя фельетоны Алеся НЯЎВЕСЯ можна пачытаць на сайце: www.alesnauwes.com