Як «уважыла» Феміда пратэстанта-інваліда
Суддзя і сакратарка мясцовага суда наведалі дома жыхара г. Барань Аршанскага раёна, інваліда-калясачніка Аляксея Каранькова, каб правесці «судовае пасяджэнне» і аштрафаваць на 81 рубль за тое, што «падсудны» падчас вулічнага шэсця пачапіў на сваю каляску бел-чырвона-белы сцяжок. Потым участковы патлумачыў «зламысніку», што суд уважыў яго з-за інваліднасці. «Хай бы ўлада ўважыла тым, што зрабіла б у пад’ездзе пандус, як штогод абяцае», — гаворыць А. Каранькоў. Пачуцці бурнымі былі, Было здзіўленне ў інваліда, І разгубіўся ён, калі, К яму дамоў прыйшла Феміда.
Адчуў ён нават лёгкі шок.
Чаму ж яму зрабіла ласку
Суддзя?
— Нацдэмаўскі сцяжок
Чапляеш на сваю каляску.
На шэсці — вось яшчэ віна —
Ты ўчора коўзаўся таксама, —
Сказала, строгая, яна,
А сакратарка запісала.
— Таму «падсадзім на рублі», —
Прысудам прагучалі словы.
Калі законніцы пайшлі,
Услед прысунуўся ўчастковы.
А ён тутэйшы, свой амаль,
Сюды не ўпаў, як кажуць, з неба.
Аднак пачаў чытаць мараль,
Бо так яму па службе трэба:
— На суддзяў ты не наракай,
Яны цябе пашкадавалі.
Каб захацелі, дык, бадай,
Твой лёс паставілі б на шалі,
І мог бы трапіць у турму
Законна, не без дай прычыны.
Ды немаведама чаму
Уважылі цябе жанчыны.
Адбыўся проста нейкі цуд:
Хоць ты і праўда вінаваты,
Аднак не выклікалі ў суд,
А да цябе прыйшлі дахаты.
І, пэўна, ад імя суддзі
Дадаў:
— Ні сам, ні па падказцы
Больш на пратэсты не «хадзі»:
Паб’юць — дарма, што ты ў калясцы.
Цябе наш доблесны АМАП
Растопча, выбачай, як гніду…
…Уважылі б напраўду, каб
Зрабілі пандус інваліду.
* * *
У «штрафніка» не сумны від,
Не бэсціць тых, хто чыніць здзекі:
— Я па здароўю інвалід,
Яны ж па розуме калекі…
Чытайце таксама ў рубры4цы «Фельетон»:
АМАПу кавуны далі б імпэт трайны
І нават на імёны стварылі забароны
Замольваць прыйдзецца грахі, аднак давольныя «вярхі»
Галовы дураць нам яны, што ў іх «сакрэтныя штаны»